17 Congress councillors unhappy with the leadership; possibility of switching to the ruling group : नेतृत्वाच्या विरोधात सत्ताधारी गटाशी सहकार्याची शक्यता, मनपातील सत्तासंतुलनावर होणार परिणाम
Akola अकोला महानगरपालिका राजकारणात सध्या मोठ्या घडामोडींना वेग आला आहे. काँग्रेस पक्षातील नेतृत्वाबाबतचा असंतोष आता उघडपणे समोर येऊ लागला असून पक्षातील सुमारे १७ नगरसेवक नाराज असल्याची चर्चा राजकीय वर्तुळात रंगली आहे. हे नगरसेवक सत्ताधारी गटाशी सहकार्याची भूमिका घेण्याच्या तयारीत असल्याची माहिती समोर येत असून त्यामुळे मनपातील राजकीय समीकरणे बदलण्याची शक्यता व्यक्त केली जात आहे.
सूत्रांच्या माहितीनुसार, विकासकामांकडे कथित दुर्लक्ष, प्रभागांतील समस्या प्रलंबित राहणे तसेच निर्णय प्रक्रियेत नगरसेवकांना पुरेसे महत्त्व दिले जात नसल्याची भावना यामुळे काही नगरसेवकांमध्ये असंतोष वाढत होता. हा असंतोष आता उघड विरोधाच्या स्वरूपात दिसून येत असल्याचे बोलले जात आहे.
नाराज नगरसेवक आपल्या प्रभागांतील विकासकामांना गती देण्यासाठी सत्ताधारी गटाशी सहकार्याचा पर्याय शोधत असल्याची चर्चा आहे. विकास प्रकल्पांना मंजुरी मिळवून देणे, निधी उपलब्ध करून घेणे आणि रखडलेली कामे मार्गी लावणे या उद्देशाने ही भूमिका घेतली जात असल्याचे सांगितले जात आहे. मात्र, यासंदर्भात कोणत्याही नगरसेवकाने अधिकृत भूमिका स्पष्ट केलेली नाही.
Heritage of Buldhana : कागदपत्रे दिली, निवेदनेही झाली; तरी चार वेशींचे संवर्धन रखडल्याने
एकाच वेळी तब्बल १७ नगरसेवकांनी पक्ष नेतृत्वापासून अंतर राखल्यास त्याचा मनपेतील सत्तासंतुलनावर परिणाम होऊ शकतो. त्यामुळे आगामी काळात नवीन राजकीय समीकरणे आकाराला येण्याची शक्यता व्यक्त होत आहे. याचा फायदा सत्ताधारी गटाला होऊ शकतो, असे राजकीय जाणकारांचे मत आहे.
महानगरपालिकेची सर्वसाधारण सभा तसेच स्थायी समितीच्या आगामी बैठकीत या असंतोषाचे पडसाद उमटण्याची शक्यता आहे. काही महत्त्वाच्या विषयांवर हे नगरसेवक पक्षाच्या भूमिकेपासून दूर राहू शकतात किंवा अप्रत्यक्षपणे शहर विकास आघाडीला पाठिंबा देऊ शकतात, अशी चर्चा राजकीय वर्तुळात सुरू आहे.
शुक्रवारी रात्री शहरातील एका हॉटेलमध्ये भारतीय जनता पक्षाच्या वरिष्ठ नेते व पदाधिकाऱ्यांसोबत काँग्रेसच्या अनेक नगरसेवकांची तसेच त्यांच्या कुटुंबीयांची बैठक झाल्याची माहिती समोर आली आहे. या बैठकीबाबत पक्ष संघटनेला माहिती नसल्याचे सांगितले जात असून त्यामुळे विविध तर्क-वितर्कांना उधाण आले आहे.
नगरसेवकांच्या नाराजीच्या चर्चेमुळे काँग्रेस नेतृत्वाची चिंता वाढली आहे. पक्षातील नाराजी दूर करून संघटनात्मक एकजूट कायम राखण्याचे मोठे आव्हान आता नेतृत्वासमोर उभे ठाकले आहे. आगामी बैठका आणि नगरसेवकांची भूमिका याकडे राजकीय वर्तुळाचे लक्ष लागले आहे.
