अर्थखात्याची मागणी,अजित पवारांनंतर पक्षाच्या नेतृत्वाचा पेच पुन्हा ऐरणीवर!
Nagpur : राष्ट्रवादी काँग्रेसच्या अजित पवार गटातील राजकीय घडामोडींनी महाराष्ट्राच्या राजकारणात नवे चर्चाविश्व निर्माण केले आहे. पक्षाच्या सहा ज्येष्ठ नेत्यांनी केंद्रीय गृहमंत्री अमित शाह यांची दिल्लीत भेट घेतली; मात्र या महत्त्वपूर्ण बैठकीत उपमुख्यमंत्री तथा पक्षाध्यक्ष सुनेत्रा पवार आणि खासदार पार्थ पवार उपस्थित नसल्याने राजकीय वर्तुळात तर्कवितर्कांना उधाण आले आहे. ही केवळ औपचारिक भेट होती की अजित पवार यांच्या निधनानंतर पक्षातील सत्ताकारण आणि नेतृत्वाची नव्याने मांडणी करण्याच्या दिशेने सुरू असलेली राजकीय चाचपणी, असा प्रश्न उपस्थित होत आहे.
प्रफुल्ल पटेल, सुनील तटकरे, दिलीप वळसे पाटील, छगन भुजबळ, हसन मुश्रीफ आणि धनंजय मुंडे या सहा नेत्यांनी सोमवारी दिल्लीत अमित शाह यांची भेट घेतली. विशेष म्हणजे, पक्षातील प्रमुख निर्णयप्रक्रियेत वरिष्ठ नेत्यांना पुरेसे महत्त्व मिळत नसल्याची नाराजी काही नेत्यांमध्ये असल्याची चर्चा या भेटीनंतर पुढे आली. पक्षातील संघटनात्मक नियुक्त्या आणि नेतृत्वाच्या भूमिकेवरूनही मतभेद असल्याचे वृत्त काही माध्यमांनी दिले आहे. मात्र, या दाव्यांना पक्षाची अधिकृत दुजोरा मिळालेला नाही.
या भेटीतील सर्वाधिक महत्त्वाचा मुद्दा म्हणजे महाराष्ट्राचे अर्थमंत्रिपद. अजित पवार यांच्याकडे असलेले अर्थखाते त्यांच्या निधनानंतर भाजपकडे गेले. त्यामुळे राष्ट्रवादीच्या वाट्याचे हे महत्त्वाचे खाते पुन्हा पक्षाला मिळावे, अशी मागणी वरिष्ठ नेत्यांकडून होत असल्याची चर्चा आहे. अर्थखात्याच्या माध्यमातून राज्याच्या आर्थिक निर्णयप्रक्रियेत पक्षाला मिळणारे स्थान आणि राजकीय प्रभाव लक्षात घेता ही मागणी केवळ मंत्रिपदापुरती मर्यादित नसून सत्तेतील वाट्याशीही संबंधित आहे.
दरम्यान, राष्ट्रवादी काँग्रेसच्या शरद पवार गटासोबत संभाव्य विलीनीकरणाच्या चर्चेलाही या भेटीमुळे महत्त्व प्राप्त झाले आहे. दोन्ही गट एकत्र आणून त्यांना महायुतीच्या चौकटीत ठेवण्याबाबत भाजपच्या पातळीवर प्रयत्न सुरू असल्याचे वृत्त सूत्रांच्या हवाल्याने बाहेर आले आहे. या संभाव्य प्रक्रियेत नेतृत्व कोणाकडे राहणार, पक्षाची संघटनात्मक सूत्रे कोण सांभाळणार आणि सत्तेतील वाटा कसा निश्चित होणार, हे महत्त्वाचे प्रश्न आहेत. मात्र, विलीनीकरणाबाबत कोणताही अंतिम निर्णय झाल्याचे अधिकृतपणे जाहीर झालेले नाही.
या सर्व चर्चांवर राष्ट्रवादीचे मुख्य प्रवक्ते उमेश पाटील यांनी स्पष्टीकरण दिले आहे. अमित शाह यांच्यासोबतची बैठक पूर्वनियोजित होती. सुनेत्रा पवार आणि पार्थ पवार यांना डावलण्याचा प्रश्नच नाही. यापूर्वी सुनेत्रा पवार यांनीच ज्येष्ठ नेत्यांच्या शिष्टमंडळाच्या भेटीसाठी वेळ मागितली होती, असे त्यांनी स्पष्ट केले. पक्षात कोणतेही मतभेद नसून सुनेत्रा पवार यांच्या नेतृत्वाखाली पक्ष एकसंध असल्याचा दावाही त्यांनी केला.
अर्थखात्यासाठी राष्ट्रवादी लाचार! अमित शहांच्या भेटीवरून विजय वडेट्टीवारांचा महायुतीवर घणाघात
अजित पवार यांच्या निधनानंतर राष्ट्रवादीसमोर नेतृत्व टिकविणे, संघटना मजबूत करणे आणि महायुतीतील राजकीय वजन कायम राखणे ही तीन महत्त्वाची आव्हाने आहेत. एका बाजूला सुनेत्रा पवार यांच्याकडे पक्षाध्यक्षपद आणि उपमुख्यमंत्रिपदाची जबाबदारी आहे, तर दुसऱ्या बाजूला प्रफुल्ल पटेल, सुनील तटकरे आणि छगन भुजबळ यांसारख्या अनुभवी नेत्यांचे संघटनात्मक व राजकीय महत्त्व कायम आहे.
त्यामुळे सहा नेत्यांची अमित शाह यांच्याशी झालेली भेट आणि त्यानंतर पक्षाकडून देण्यात आलेले स्पष्टीकरण या दोन्ही घडामोडी महत्त्वाच्या ठरतात. ही भेट पक्षातील समन्वयाचा भाग होती की भविष्यातील सत्तावाटप आणि नेतृत्वाच्या भूमिकेबाबतची रणनीती, याचे उत्तर आगामी घडामोडींमधून स्पष्ट होईल. राष्ट्रवादीचे नेतृत्व, अर्थखाते आणि दोन्ही गटांच्या एकत्रीकरणाचा प्रश्न या तीन मुद्द्यांवरच महाराष्ट्राच्या राजकारणातील पुढील समीकरणे ठरण्याची शक्यता आहे.
_____
