sanjay-gaikwad-shivaji-kon-hota-book-controversy-prashant-ambi-complaint : विरोधकांकडून आमदार संजय गायकवाड यांच्यावर कारवाईची मागणी तीव्र
Mumbai : ‘शिवाजी कोण होता?’ या कॉम्रेड गोविंद पानसरे लिखित पुस्तकावरून शिवसेना शिंदे गटाचे आमदार संजय गायकवाड वादाच्या भोवऱ्यात सापडले असून प्रकाशक प्रशांत आंबी यांना कथित शिवीगाळ आणि जीवे मारण्याच्या धमकीच्या आरोपांमुळे राज्यातील राजकीय वातावरण तापले आहे. या प्रकरणी प्रशांत आंबी यांनी कोल्हापूरमधील राजारामपुरी पोलीस ठाण्यात तक्रार दाखल केली असून आमदार गायकवाड यांच्यावर गुन्हा दाखल करण्याची मागणी केली आहे. दरम्यान, विरोधी पक्षांनी या घटनेचा निषेध करत तात्काळ कठोर कारवाईची मागणी केली आहे.
मिळालेल्या माहितीनुसार, १९८८ साली प्रकाशित झालेल्या ‘शिवाजी कोण होता?’ या पुस्तकाच्या आशयावरून नाराजी व्यक्त करत संजय गायकवाड यांनी प्रकाशक प्रशांत आंबी यांना फोनवरून अर्वाच्य भाषेत शिवीगाळ केली तसेच जीवे मारण्याची धमकी दिल्याचा आरोप आहे. आंबी यांनी दिलेल्या तक्रारीत भारतीय दंडसंहितेतील विविध कलमांखाली गुन्हा दाखल करण्याची मागणी केली असून पोलिसांनी तक्रार स्वीकारून कायदेशीर सल्ल्यानंतर पुढील निर्णय घेण्यात येईल असे सांगितले आहे.
Donald Trump : मोजतबा खामेनेई गंभीर जखमी, ट्रंप म्हणाले “इराणकडे वेळ कमी” !
या प्रकरणावरून राज्यातील राजकीय नेत्यांच्या तीव्र प्रतिक्रिया उमटत आहेत. काँग्रेस नेत्या यशोमती ठाकूर यांनी या घटनेचा निषेध करत प्रकाशकाला दिलेल्या धमकीला गांभीर्याने घेत मुख्यमंत्री तथा गृहमंत्री देवेंद्र फडणवीस यांनी तातडीने कारवाई करावी आणि प्रशांत आंबी यांना पोलीस संरक्षण द्यावे, अशी मागणी केली आहे. काँग्रेसचेच नेते विजय वडेट्टीवार यांनीही या घटनेला लज्जास्पद म्हणत धमकी देणाऱ्या आमदारावर गुन्हा दाखल करण्याची गरज व्यक्त केली आहे.
वंचित बहुजन आघाडीचे नेते प्रकाश आंबेडकर यांनी या वादाला वैचारिक स्वरूप देत ‘शिवाजी कोण होता?’ हे पुस्तक छत्रपती शिवाजी महाराजांच्या विचारांचे वास्तव दर्शन घडवते, असा दावा केला आहे. तसेच या पुस्तकाच्या सामूहिक वाचनाचे आयोजन करण्याचे आवाहन त्यांनी कार्यकर्त्यांना केले आहे. राष्ट्रवादी काँग्रेसचे आमदार अमोल मिटकरी यांनीही संजय गायकवाड यांना हे पुस्तक भेट देण्याची घोषणा केली आहे.
Vidhan Parishad election : महायुतीत विधानपरिषद निवडणुकीवरून तीव्र स्पर्धा
दरम्यान, राष्ट्रवादीचे नेते जितेंद्र आव्हाड यांनी सोशल मीडियावर पोस्ट करत संजय गायकवाड यांच्यावर गंभीर आरोप केले असून त्यांच्या वक्तव्यामुळे छत्रपती शिवाजी महाराजांचा अपमान झाल्याचा दावा केला आहे. या सर्व पार्श्वभूमीवर प्रकरण अधिकच चिघळत असून राजकीय आरोप-प्रत्यारोपांना उधाण आले आहे.
स्वतः प्रशांत आंबी यांनी माध्यमांशी बोलताना सांगितले की, “हे पुस्तक गेली अनेक दशके प्रकाशित आहे. आमदारांनी ते वाचल्याशिवाय प्रतिक्रिया दिली. मला जीवे मारण्याच्या धमक्या देण्यात आल्या तसेच अत्यंत अर्वाच्य भाषेत शिवीगाळ करण्यात आली.” त्यांनी आपल्या जीवाला धोका असल्याची भीती व्यक्त करत पोलीस संरक्षणाची मागणी केली आहे.
सध्या पोलिसांकडून या तक्रारीवर कायदेशीर प्रक्रिया सुरू असून आमदार संजय गायकवाड यांच्याविरोधात गुन्हा नोंदवला जाणार का, याकडे सर्वांचे लक्ष लागले आहे. या प्रकरणात राज्य सरकार आणि गृहमंत्रालय कोणती भूमिका घेते, यावर पुढील राजकीय घडामोडी अवलंबून असणार आहेत.
___
