tukaram-mundhe-clarification-on-fda-employees-complaint-chhatrapati-sambhajinagar : प्रशासन आणि कर्मचारी यांच्यातील मतभेदांमुळे एफडीएच्या कामकाजाबाबत प्रश्न
Mumbai : अन्न व औषध प्रशासनाच्या प्रयोगशाळेतील २९ अधिकारी आणि कर्मचाऱ्यांनी कामाच्या वाढत्या ताणाबाबत तक्रार केल्यानंतर आता आयुक्त तुकाराम मुंढे यांनी त्यावर सविस्तर स्पष्टीकरण दिले आहे. कर्मचाऱ्यांकडून अतिरिक्त काम करून घेतले जात असल्याचा आरोप वस्तुस्थितीला धरून नसल्याचा दावा करत, नियमानुसार आठवड्याला केवळ ४८ तासांचेच काम घेतले जात असल्याचे मुंढे यांनी स्पष्ट केले आहे.
छत्रपती संभाजीनगर येथील राज्य अन्न व औषध प्रशासन प्रयोगशाळेतील २९ अधिकारी आणि कर्मचाऱ्यांनी १५ जुलै रोजी मंत्री नरहरी झिरवाळ यांच्याकडे लेखी निवेदन सादर केले होते. या निवेदनात दोन शिफ्टमध्ये काम करण्याचा निर्णय, अपुरे मनुष्यबळ, शनिवार-रविवार तसेच सार्वजनिक सुट्टीच्या दिवशी कामाचे आदेश आणि वाढत्या कामाच्या ताणामुळे तपासणीच्या गुणवत्तेवर परिणाम होण्याची भीती व्यक्त करण्यात आली होती.
Atul londhe : एमपीएससीमधून अधिकारी होण्याच्या तरुणांच्या स्वप्नावर सरकारचा बुलडोझर
मात्र, या सर्व आरोपांना उत्तर देताना तुकाराम मुंढे यांनी प्रशासनाची बाजू ठामपणे मांडली आहे. प्रयोगशाळेतील कर्मचाऱ्यांना आवश्यकतेनुसार विविध प्रकारची कामे दिली जातात आणि कामाचे नियोजन पूर्णपणे नियमांच्या चौकटीत केले जाते, असे त्यांनी सांगितले. कोणत्याही कर्मचाऱ्याकडून अतिरिक्त तास काम करून घेतले जात नसून, दर आठवड्याला केवळ ४८ तासांचे कामच घेतले जाते, असा दावा त्यांनी केला.
मुंढे यांच्या म्हणण्यानुसार, प्रयोगशाळेतील प्रलंबित नमुन्यांची संख्या वाढत असल्याने कामाचे योग्य नियोजन करण्यासाठी दोन पाळ्यांची व्यवस्था करण्यात आली आहे. ही व्यवस्था केवळ गरज लक्षात घेऊन सुरू करण्यात आली असून, कर्मचाऱ्यांवर कोणत्याही प्रकारचा अतिरिक्त भार टाकण्यात आलेला नाही.
दुसरीकडे, कर्मचाऱ्यांनी आपल्या तक्रारीत अनेक पदे रिक्त असल्याचा मुद्दा उपस्थित केला आहे. अपुऱ्या मनुष्यबळामुळे विद्यमान कर्मचाऱ्यांवर अधिक जबाबदाऱ्या पडत असल्याचे त्यांनी म्हटले आहे. तसेच अन्न, औषधे आणि सौंदर्यप्रसाधनांच्या नमुन्यांची तपासणी करताना आंतरराष्ट्रीय मानकांनुसार पुरेसा वेळ मिळत नसल्याने विश्लेषणाच्या गुणवत्तेवर परिणाम होण्याची शक्यता असल्याची भीतीही त्यांनी व्यक्त केली आहे.
कर्मचाऱ्यांनी दोन शिफ्टचा निर्णय रद्द करून पूर्ववत कार्यालयीन वेळ लागू करण्याची मागणी केली आहे. याशिवाय अतिरिक्त कर्मचारी, तांत्रिक सहाय्यक आणि आवश्यक सुविधा उपलब्ध करून देण्याची मागणीही करण्यात आली आहे.
दरम्यान, प्रशासन आणि कर्मचारी यांच्यातील या मतभेदांमुळे एफडीएच्या कामकाजाबाबत अनेक प्रश्न उपस्थित झाले आहेत. एका बाजूला कर्मचाऱ्यांनी वाढत्या ताणाबाबत नाराजी व्यक्त केली आहे, तर दुसऱ्या बाजूला तुकाराम मुंढे यांनी सर्व आरोप फेटाळून लावत कामकाज नियमांनुसार सुरू असल्याचा दावा केला आहे. त्यामुळे आता सरकार या प्रकरणात कोणती भूमिका घेते, याकडे सर्वांचे लक्ष लागले आहे.
