BJP and NCP workers face off over campaigning : सोसायटीत प्रचाराला मनाई, मुख्य गेटला ठोकले टाळे
Pimpri-Chinchwad पिंपरी-चिंचवड महानगरपालिकेच्या निवडणुकीत राष्ट्रवादी काँग्रेस आणि भाजप यांच्यातील संघर्षाने नवे वळण घेतले आहे. ‘या सोसायटीत प्रचार करायचा नाही’ असे बजावल्याने दोन्ही पक्षांचे कार्यकर्ते गेटवरच आमने-सामने आले आणि मोठा राडा झाला. या घटनेमुळे निवडणुकीचे वातावरण अधिकच तापले असून मतदारांमध्ये चर्चेची लाट उसळली आहे.
पिंपरी-चिंचवड महानगरपालिका निवडणूक ही राज्यातील महत्त्वाची निवडणूक मानली जाते. येथे भाजपने मागील निवडणुकीत सत्ता मिळवली होती. मात्र यंदा राष्ट्रवादी काँग्रेसने अजित पवार यांच्या नेतृत्वाखाली जोरदार तयारी केली आहे. दोन्ही पक्षांचे कार्यकर्ते शहरातील विविध सोसायट्यांमध्ये प्रचार करत आहेत.
याच पार्श्वभूमीवर एका सोसायटीत प्रचाराला मनाई करण्यात आली. यावरून राष्ट्रवादी काँग्रेस आणि भाजपचे कार्यकर्ते गेटवरच भिडले. माहितीनुसार, रविवारी सायंकाळी भाजप उमेदवार आणि त्यांचे कार्यकर्ते प्रभाग क्र. ९ मधील एका सोसायटीत प्रचारासाठी गेले असता त्यावेळी राष्ट्रवादी काँग्रेसच्या समर्थकांनी भाजप उमेदवारांनी या सोसायटीत प्रचार करू नये, अशी धमकी दिली. राष्ट्रवादीच्या समर्थकांनी थेट सोसायटीच्या मुख्य गेटला टाळे ठोकले. दोन्ही बाजूंनी जोरदार घोषणाबाजी करण्यात आली. काही वेळेस परिस्थिती तणावपूर्ण झाली आणि पोलिसांना हस्तक्षेप करावा लागला.
पिंपरी-चिंचवडमधील निवडणूक नेहमीच रंगतदार ठरते. शहरातील मोठ्या प्रमाणावर असलेल्या सोसायट्या या निवडणुकीत निर्णायक ठरतात. प्रत्येक पक्ष आपल्या उमेदवारासाठी मतदारांना आकर्षित करण्याचा प्रयत्न करतो. मात्र या घटनेमुळे मतदारांमध्ये संभ्रमाचे वातावरण निर्माण झाले आहे. तसेच यावेळी अजित पवार विरुद्ध भाजप असा संघर्ष पाहायला मिळाला आहे. अजित पवारांविरुद्ध याच प्रभागात जोरदार बॅनरबाजी झाली होती.
या घटनेनंतर पोलिसांनी दोन्ही पक्षांच्या कार्यकर्त्यांना इशारा दिला आहे की, निवडणुकीदरम्यान कायदा-सुव्यवस्था बिघडवण्याचा प्रयत्न केल्यास कठोर कारवाई करण्यात येईल. मात्र अशा प्रकारच्या संघर्षामुळे निवडणुकीचा मूळ मुद्दा बाजूला पडत असल्याची टीका होत आहे.
