eknath-shinde-nominate-jyoti-waghmare-for-rajyasabha-seat : वेटरची मुलगी ते संसद भवन, ज्योती वाघमारे जाणार राज्यसभेत
Mumbai महाराष्ट्रातील राज्यसभा निवडणुकीच्या रणधुमाळीत मुख्यमंत्री एकनाथ शिंदे यांच्या नेतृत्वाखालील शिवसेनेने अत्यंत अनपेक्षित आणि धक्कादायक निर्णय घेत सर्वांचे लक्ष वेधून घेतले आहे. राज्यसभेच्या एका जागेसाठी अनेक दिग्गज नेत्यांची नावे चर्चेत असताना, पक्षाने सोलापूरच्या आक्रमक दलित नेत्या ज्योती वाघमारे यांच्या नावावर शिक्कामोर्तब केले आहे.
या निर्णयामुळे केवळ राजकीय वर्तुळातच नव्हे, तर समाजकारणातही मोठी चर्चा सुरू झाली असून, शिंदे गटाने या माध्यमातून मोठे सामाजिक समीकरण साधल्याचे मानले जात आहे.
राज्यसभेच्या या जागेसाठी राहुल शेवाळे, गजानन कीर्तीकर आणि संजय निरुपम यांसारख्या अनुभवी नेत्यांची नावे आघाडीवर होती. मात्र, प्रस्थापित चेहऱ्यांऐवजी एका सामान्य कुटुंबातील आणि आंबेडकरी चळवळीतील कणखर नेतृत्वाला संधी देऊन एकनाथ शिंदे यांनी आपली वेगळी राजकीय दिशा स्पष्ट केली आहे.
Ajit Pawar accident : अजित पवारांच्या अपघातावरून राष्ट्रवादीच्या आमदारांमध्ये संभ्रम
ज्योती वाघमारे यांचा प्रवास अत्यंत संघर्षाचा राहिला आहे. त्यांचे वडील नागनाथ वाघमारे हे हॉटेलमध्ये वेटरचे काम करत असतानाही दलित पँथरचे सक्रिय कार्यकर्ते होते आणि त्यांनी सोलापूर महापालिकेत नगरसेवक म्हणूनही मजल मारली होती. वडिलांचा हाच वारसा जपत ज्योती वाघमारे यांनी मानवी हक्क अभियान आणि विद्रोही सांस्कृतिक चळवळीच्या माध्यमातून आपली ओळख निर्माण केली आहे.
विशेष म्हणजे, २००२ ते २००४ दरम्यान त्यांनी प्रणिती शिंदे यांच्यासोबतही काम केले होते. मात्र, त्यानंतर त्यांनी स्वतःचे स्वतंत्र राजकीय अस्तित्व निर्माण करत सामाजिक प्रश्नांवर सातत्याने आवाज उठवला. सोलापूरसह पश्चिम महाराष्ट्र आणि मराठवाड्यातील दलित समाजाला प्रतिनिधित्व देण्याच्या उद्देशाने ही उमेदवारी अत्यंत महत्त्वाची मानली जात आहे. त्यांच्या प्रभावी वक्तृत्वामुळे आणि जनसंपर्कामुळे पक्षाला आगामी निवडणुकांमध्ये मोठा फायदा होईल, अशी रणनीती शिंदे गटाने आखली आहे.
Rajya sabha election : शरद पवारांमुळेच प्रियंका चतुर्वेदींना डच्चू; संजय राऊतांचा गौप्यस्फोट
राज्यातील सात जागांसाठी होणाऱ्या या राज्यसभा निवडणुकीत आता मोठी चुरस निर्माण झाली आहे. एकीकडे महाविकास आघाडीकडून शरद पवार यांच्यासारख्या दिग्गज नेत्याचे नाव चर्चेत असताना, महायुतीने ज्योती वाघमारे यांच्यासारखा नवा आणि तळागाळातील चेहरा देऊन निवडणुकीत रंगत आणली आहे.
आमदारांच्या संख्याबळावर ही निवडणूक अवलंबून असली, तरी वाघमारे यांच्या उमेदवारीने विरोधकांसमोर पेच निर्माण झाला आहे. आता या निवडीचा परिणाम आगामी विधानसभा आणि स्थानिक स्वराज्य संस्थांच्या निवडणुकांवर कसा होतो, हे पाहणे औत्सुक्याचे ठरेल.
