Credit war begins within mahayuti on Khamgao – jalna railway : खामगाव-जालना रेल्वेवर महायुतीत श्रेयवाद; अधिसूचनेवरूनच राजकीय शर्यत सुरू
Khamgao खामगाव-जालना रेल्वे मार्गासाठी जमीन अधिग्रहणाची अधिसूचना जारी होताच राजकीय वर्तुळात हालचालींना वेग आला आहे. अनेक वर्षांपासून रखडलेल्या या महत्त्वाकांक्षी प्रकल्पाला अखेर प्रशासकीय स्तरावर गती मिळाल्याचे चित्र असताना, प्रत्यक्ष काम सुरू होण्यापूर्वीच श्रेयासाठी राजकीय स्पर्धा रंगू लागल्याची चर्चा आहे.
खामगाव-जालना रेल्वे मार्ग हा विदर्भ आणि मराठवाड्याला जोडणारा महत्त्वाचा प्रकल्प मानला जातो. या प्रकल्पासाठी जमीन अधिग्रहण प्रक्रियेची अधिसूचना प्रसिद्ध झाल्यानंतर विविध राजकीय पक्ष आणि नेत्यांनी आपल्या भूमिकेचा उल्लेख करत श्रेय घेण्यास सुरुवात केली आहे.
भाजपचे पदाधिकारी हा निर्णय पंतप्रधान नरेंद्र मोदी आणि रेल्वेमंत्री अश्विनी वैष्णव यांच्या नेतृत्वाखालील केंद्र सरकारच्या विकासाभिमुख धोरणांचे फलित असल्याचे सांगत आहेत. तर दुसरीकडे, शिंदेसेनेचे कार्यकर्ते आणि पदाधिकारी केंद्रीय आयुष व आरोग्य राज्यमंत्री तथा खासदार प्रतापराव जाधव यांच्या सातत्यपूर्ण पाठपुराव्यामुळेच प्रकल्पाला गती मिळाल्याचा दावा करत आहेत.
Sanjay Gaikwad: माझ्या मतदारसंघातही हस्तक्षेप होतोय; संजय गायकवाडांचा अब्दुल सत्तारांच्या सुरात सूर
विशेष म्हणजे, हा प्रकल्प अद्याप प्रारंभिक प्रशासकीय टप्प्यात असून जमीन अधिग्रहण, निधी, निविदा प्रक्रिया आणि प्रत्यक्ष बांधकाम यांसारखे अनेक महत्त्वाचे टप्पे अद्याप बाकी आहेत. तरीही प्रकल्पाचे काम प्रत्यक्ष रुळावर येण्यापूर्वीच श्रेयाचे राजकारण वेगाने धावत असल्याचे चित्र दिसत आहे.
महायुतीतील मित्रपक्षांमध्येच सुरू झालेली ही श्रेयाची स्पर्धा आगामी काळात अधिक तीव्र होण्याची शक्यता व्यक्त केली जात आहे. रेल्वे मार्गाचे प्रत्यक्ष काम किती वेगाने पुढे सरकते, याकडे जनतेचे लक्ष असताना राजकीय वर्तुळात मात्र ‘हा प्रकल्प कोणामुळे झाला?’ यावरच अधिक चर्चा रंगताना दिसत आहे.
एकंदरीत, रेल्वे गाडी अजून रुळावर आलेली नसली तरी श्रेयाची गाडी मात्र राजकीय पटावर वेगाने धावत असल्याचे चित्र सध्या पाहायला मिळत आहे.
