sajid-khan-pathan-bishnoi-gang-threat-phone-call-akola-congress : आमदार साजिद खान पठाण यांना पुन्हा जीवे मारण्याची धमकी
Mumbai: अकोल्याचे काँग्रेस आमदार साजिद खान पठाण यांना पुन्हा जीवे मारण्याची आणि खंडणीची धमकी मिळाल्याचा गंभीर प्रकार समोर आला आहे. कथित बिश्नोई गँगच्या नावाने करण्यात आलेल्या धमकीच्या फोन कॉलमुळे राज्याच्या राजकारणात खळबळ उडाली असून या प्रकरणाचे पडसाद विधानसभेतही उमटले. काँग्रेसचे प्रदेशाध्यक्ष नाना पटोले यांनी सभागृहात हा मुद्दा उपस्थित करत आमदार साजिद खान पठाण यांना तातडीने सुरक्षा देण्याची मागणी केली. यानंतर विधानसभा अध्यक्षांनीही सरकारला या प्रकरणाची गंभीर दखल घेण्याचे निर्देश दिले.
दरम्यान, महाराष्ट्र काँग्रेसने सोशल मीडिया प्लॅटफॉर्म ‘एक्स’वर कथित धमकीच्या फोन कॉलचे ऑडिओ रेकॉर्डिंग शेअर केले आहे. या रेकॉर्डिंगमध्ये स्वतःला बिश्नोई गँगशी संबंधित असल्याचा दावा करणारी व्यक्ती साजिद खान पठाण यांच्यापर्यंत शेवटचा इशारा पोहोचवण्यास सांगताना ऐकू येते. संबंधित व्यक्ती, “आता फोन येणार नाही, थेट गोळी येईल,” अशी धमकी देत असल्याचे ऑडिओमध्ये ऐकू येत आहे. मात्र, या ऑडिओ रेकॉर्डिंगची स्वतंत्रपणे पुष्टी झालेली नाही.
Women farmers bill : शेतजमीन नसली तरी मिळणार ‘महिला शेतकरी’चा दर्जा
माहितीनुसार, हा धमकीचा फोन काँग्रेसचे नगरसेवक आकाश कावडे यांच्या मोबाईलवर आला होता. फोन करणाऱ्या व्यक्तीने साजिद खान पठाण यांच्यापर्यंत संदेश पोहोचवण्याची सूचना केली. त्याचबरोबर खंडणीची रक्कम तयार ठेवण्याचा इशारा देत पैसे न दिल्यास गंभीर परिणामांना सामोरे जावे लागेल, असेही कथितरीत्या सांगितले. फोन करणाऱ्या व्यक्तीने स्वतःचे नाव शुभम लोणकर असल्याचे सांगितल्याचे समोर आले आहे.
या प्रकरणात साजिद खान पठाण यांना यापूर्वीही १७ फेब्रुवारी २०२६ रोजी धमकी मिळाली होती. त्यानंतर ३० जून रोजी पुन्हा कथित बिश्नोई गँगच्या नावाने खंडणीची मागणी करत जीवे मारण्याची धमकी देण्यात आल्याची माहिती समोर आली आहे. सलग दुसऱ्यांदा अशा प्रकारे धमकी मिळाल्याने सुरक्षा व्यवस्थेबाबत प्रश्न उपस्थित केले जात आहेत.
Waives royalty : शेतकऱ्यांना मोठा दिलासा! शेतीकामासाठी माती, मुरूमवरील रॉयल्टी रद्द
काँग्रेसने या घटनेवरून राज्य सरकार आणि केंद्र सरकारवरही टीका केली आहे. ऐन विधानसभा अधिवेशनाच्या काळात एका आमदाराला पुन्हा खंडणीसाठी जीवे मारण्याची धमकी मिळणे हे राज्यातील कायदा आणि सुव्यवस्थेच्या स्थितीवर गंभीर प्रश्नचिन्ह निर्माण करणारे असल्याचे पक्षाने म्हटले आहे. लोकप्रतिनिधीच सुरक्षित नसतील तर सामान्य नागरिकांच्या सुरक्षेचे काय, असा सवालही काँग्रेसने उपस्थित केला आहे.
विधानसभेत बोलताना आमदार साजिद खान पठाण यांनीही आपली भूमिका स्पष्ट केली. पहिल्यांदा धमकी मिळाल्यानंतर तत्कालीन मुख्यमंत्री देवेंद्र फडणवीस यांनी मध्यरात्री फोन करून विचारपूस केली होती, असे त्यांनी सांगितले. मात्र, पुन्हा धमकी मिळाल्यानंतर त्यांनी सुरक्षा नको असल्याचे स्पष्ट करत, “उद्या बाबा सिद्दीकी यांच्याप्रमाणे माझाही खून झाला, तर मी राजेश्वर मंदिरासाठी मागितलेला निधी त्या मंदिराच्या बांधकामासाठी वापरावा,” अशी भावनिक प्रतिक्रिया सभागृहात व्यक्त केली.
या संपूर्ण प्रकरणाची चौकशी सुरू असून धमकीमागील व्यक्तींचा शोध घेण्यासाठी पोलिस यंत्रणा तपास करत आहे. धमकीचा कॉल, त्यामागील सत्यता आणि संभाव्य कट याबाबत तपासानंतरच अधिकृत चित्र स्पष्ट होणार आहे.
___
