अमेरिकेतील संवादात भाजपच्या संघटनात्मक स्थितीवर निशाणा; परराष्ट्र धोरणावरही टीका
New delhi : केंद्रातील मोदी सरकार आणि विरोधकांमधील राजकीय संघर्षाला आता नव्या दाव्यामुळे वेगळे वळण मिळण्याची शक्यता निर्माण झाली आहे. लोकसभेतील विरोधी पक्षनेते राहुल गांधी यांनी अमेरिकेच्या दौऱ्यातून केंद्र सरकारमधील काही मंत्री विरोधकांच्या संपर्कात असल्याचा खळबळजनक दावा केला आहे. हे मंत्री सरकारमधील घडामोडींची माहिती विरोधकांना देत असल्याचेही त्यांनी म्हटले आहे. विशेष म्हणजे, आगामी आठ महिन्यांत या राजकीय परिस्थितीचे परिणाम दिसून येतील, असे सूचक विधानही राहुल गांधी यांनी केले. त्यांच्या या दाव्यामुळे राष्ट्रीय राजकारणात चर्चेला उधाण आले आहे.
अमेरिका दौऱ्यादरम्यान शिकागो विद्यापीठात विद्यार्थ्यांशी संवाद साधताना राहुल गांधी यांनी देशातील सध्याच्या राजकीय परिस्थितीवर भाष्य केले. भाजपची अंतर्गत संघटनात्मक रचना कमकुवत होत असल्याचा दावा करत त्यांनी केंद्र सरकारमधील काही मंत्र्यांच्या भूमिकेबाबतही संकेत दिले. सरकारमधील काही मंत्री विरोधकांच्या संपर्कात असून, त्यांच्याकडून महत्त्वाच्या घडामोडींची माहिती मिळत असल्याचे राहुल गांधी यांनी सांगितले. मात्र, या मंत्र्यांची नावे किंवा त्यांच्या संपर्कामागील नेमके स्वरूप त्यांनी स्पष्ट केले नाही.
आगामी आठ महिन्यांत या घडामोडींचा परिणाम राजकीय पटलावर दिसू शकतो, असे विधान त्यांनी केल्याने त्यांच्या दाव्याबाबत तर्कवितर्क सुरू झाले आहेत. केंद्र सरकारमध्ये अंतर्गत अस्वस्थता आहे का आणि सत्ताधारी पक्षातील काही नेत्यांच्या भूमिकेत बदल होण्याची शक्यता आहे का, यावर राजकीय वर्तुळात चर्चा सुरू झाली आहे.
मुख्यमंत्र्यांच्या आश्वासनानंतरही साशंकता; विमानतळ भूसंपादनाला विरोध कायम!
राहुल गांधी यांनी याच संवादात भारताच्या परराष्ट्र धोरणावरही केंद्र सरकारला लक्ष्य केले. स्वातंत्र्यापासून भारताला स्वतंत्र आणि प्रगल्भ भू- राजकीय दृष्टिकोन होता. अमेरिका, इराण आणि रशियासारख्या देशांशी भारताचे चांगले संबंध राहिले आहेत. मात्र, या संबंधांचा प्रभावी राजनैतिक उपयोग करण्यात सध्याचे सरकार अपयशी ठरल्याची टीका त्यांनी केली.
पाकिस्तान इराण आणि अमेरिकेशी चर्चा करण्यात सक्रिय असताना भारताची भूमिका काय, असा सवालही त्यांनी उपस्थित केला. भारताचा आकार, इतिहास आणि आंतरराष्ट्रीय संबंध लक्षात घेता जागतिक घडामोडींमध्ये भारताने अधिक प्रभावी भूमिका बजावणे अपेक्षित होते. मात्र, सध्या भारत जागतिक स्तरावर ‘साइड प्लेअर’ बनल्याचे चित्र असल्याचे राहुल गांधी म्हणाले.
भारताकडे स्वतःचा आवाज आणि स्वतंत्र दृष्टिकोन होता; मात्र सध्याच्या परिस्थितीत तो प्रभाव कमी झाल्याचा आरोपही त्यांनी केला. या संवादाचा व्हिडिओ राहुल गांधी यांनी आपल्या ‘एक्स’ या सोशल मीडिया खात्यावरून शेअर केला आहे.
लोकसभेसाठी अडीच वर्षे आधीच मोर्चेबांधणी संभाव्य उमेदवाराची मतदारसंघात सक्रियता!
मोदी सरकारमधील मंत्री विरोधकांच्या संपर्कात असल्याचा राहुल गांधी यांचा दावा आणि आठ महिन्यांत परिणाम दिसण्याचे विधान यामुळे आगामी राजकीय घडामोडींबाबत उत्सुकता वाढली आहे. या दाव्याला केंद्र सरकार किंवा संबंधित मंत्र्यांकडून काय प्रतिक्रिया मिळते, तसेच प्रत्यक्षात कोणते राजकीय बदल घडतात, याकडे आता सर्वांचे लक्ष लागले आहे. तूर्तास राहुल गांधी यांच्या विधानामुळे केंद्रातील सत्ताधारी आणि विरोधकांमधील राजकीय संघर्षाला नवा मुद्दा मिळाला आहे.






