mumbai-operation-white-strike-ncb-seizes-1745-crore-cocaine-international-drug-racket : मुंबईत एनसीबीचा ‘ऑपरेशन व्हाइट स्ट्राइक’चा मोठा स्फोट
Mumbai : देशातील अमली पदार्थांच्या विरोधातील लढ्यात नार्कोटिक्स कंट्रोल ब्युरोने मोठी आणि धडक कारवाई करत मुंबई परिसरात तब्बल १ हजार ७४५ कोटी रुपये मूल्याचे ३४९ किलो कोकेन जप्त केले आहे. अलीकडच्या काळातील ही सर्वांत मोठ्या ड्रग्जविरोधी कारवायांपैकी एक मानली जात असून, या कारवाईमुळे आंतरराष्ट्रीय अमली पदार्थ तस्करी रॅकेटला मोठा धक्का बसल्याचे मानले जात आहे. नवी मुंबईतील कळंबोली आणि ठाणे जिल्ह्यातील भिवंडी परिसरात ही कारवाई करण्यात आली.
‘ऑपरेशन व्हाइट स्ट्राइक’ या नावाने राबवण्यात आलेल्या या विशेष मोहिमेची तयारी तब्बल सहा महिन्यांपासून सुरू होती. भारतीय गुप्तचर यंत्रणा आणि आंतरराष्ट्रीय तपास संस्थांकडून मिळालेल्या गुप्त माहितीनंतर एनसीबीच्या मुंबई विभागाने अत्यंत गोपनीय पद्धतीने ही मोहीम आखली होती. अखेर योग्य वेळी सापळा रचत अधिकाऱ्यांनी कोट्यवधी रुपयांचे अमली पदार्थ जप्त करण्यात यश मिळवले.
Ashok kharat case : समता पतसंस्था गैरव्यवहार प्रकरण तापलं; प्रतिभा चाकणकरांना ईडीचे समन्स !
कळंबोली परिसरातील केडब्ल्यूसी वेअरहाउसिंग कॉम्प्लेक्सजवळ एका मारुती वाहनाची तपासणी करण्यात आली. या वाहनामध्ये क्रिकेट पॅड्स आणि ग्लोव्हजच्या आत अत्यंत चतुराईने कोकेन लपवण्यात आले होते. तपासादरम्यान सुमारे एक किलो वजनाच्या १३६ पाकिटांमध्ये कोकेन आढळून आले. या प्रकरणात एका आरोपीला तात्काळ अटक करण्यात आली असून त्याच्याकडून महत्त्वाची माहिती मिळाल्याचे अधिकाऱ्यांनी सांगितले.
या आरोपीच्या चौकशीतून भिवंडीतील आणखी एका मोठ्या साठ्याचा तपास लागला. त्यानंतर एनसीबीच्या पथकाने राहनाळ गावातील एका गोदामावर छापा टाकून आणखी २१३ पाकिटे जप्त केली. भिवंडी येथे सापडलेले कोकेन यंत्रसामग्रीच्या आतल्या गुप्त कप्प्यांमध्ये लपवून ठेवण्यात आले होते. प्रत्येक पॅकेट नऊ स्तरांच्या पॉलिथिनमध्ये सीलबंद करण्यात आले होते आणि त्यावर काळ्या चिकट पदार्थाचा वापर करण्यात आला होता, जेणेकरून तपास यंत्रणांना संशय येऊ नये.
दरम्यान, गेल्या काही दिवसांपासून एनसीबीने अमली पदार्थांविरोधात आक्रमक मोहीम सुरू केली आहे. याच आठवड्यात कुख्यात ड्रग्ज तस्कर आणि अंडरवर्ल्ड डॉन दाऊद इब्राहिमचा हस्तक मानल्या जाणाऱ्या सलीम डोला याला तुर्कस्थानमधून भारतात प्रत्यार्पण करून अटक करण्यात आली होती. त्यानंतर आता मुंबईत झालेल्या या कारवाईमुळे देशातील ड्रग्ज नेटवर्कवर मोठा प्रहार झाल्याचे बोलले जात आहे.
राज्यात अमली पदार्थांविरोधातील मोहिमेला आणखी वेग देण्यासाठी नागपूरमध्ये महाराष्ट्र दिनापासून अत्याधुनिक ड्रग्ज टेस्टिंग मशिनचा वापर सुरू करण्यात आला आहे. या तंत्रज्ञानामुळे रस्त्यावरच वाहनचालकांची तपासणी करून त्यांनी अमली पदार्थांचे सेवन केले आहे का, याचा तात्काळ अहवाल मिळणार आहे. त्यामुळे रेव्ह पार्टी, रात्री उशिरा नशेत वाहन चालवणे आणि ड्रग्जच्या प्रभावाखाली होणारे गुन्हे रोखण्यासाठी पोलिसांना मोठी मदत होणार आहे. नागपूरनंतर मुंबई, पुणे आणि राज्यातील इतर प्रमुख शहरांमध्येही ही सुविधा सुरू करण्याचे नियोजन करण्यात आले आहे.
या संपूर्ण कारवाईनंतर केंद्रीय गृहमंत्री अमित शाह यांनी एनसीबीच्या पथकाचे कौतुक केले आहे. त्यांनी ‘एक्स’वरील पोस्टमध्ये अमली पदार्थांविरोधातील लढाईत केंद्र सरकार कठोर कारवाई करण्यास कटिबद्ध असल्याचे स्पष्ट केले. मुंबईत १ हजार ७४५ कोटी रुपयांचे कोकेन जप्त करून एनसीबीने आंतरराष्ट्रीय ड्रग्ज रॅकेटवर मोठा प्रहार केला असल्याचे त्यांनी म्हटले. तसेच या मोहिमेत सहभागी सर्व अधिकाऱ्यांचे अभिनंदन करत देशभरात अमली पदार्थांविरोधातील कारवाया आणखी तीव्र केल्या जातील, असा संदेशही त्यांनी दिला.
