followers-campaign-shahikant-khedekar-as-future-member-of-parliament : कार्यकर्त्यांकडून ‘भावी खासदार’ म्हणून प्रचार, जिल्ह्याच्या राजकारणात खळबळ
Buldhana जिल्ह्याच्या राजकीय वर्तुळात सध्या सोशल मीडियावरील एका पोस्टने चांगलीच खळबळ उडवली आहे. माजी आमदार डॉ. शशिकांत खेडेकर यांच्या समर्थकांकडून ‘भावी खासदार डॉ. शशिकांत खेडेकर’ अशा आशयाच्या पोस्ट मोठ्या प्रमाणात व्हायरल होत असल्याने या मोहिमेमागे नेमके कोण आहे, याबाबत राजकीय वर्तुळात विविध चर्चा रंगू लागल्या आहेत.
फेसबुक, व्हॉट्सअॅपसह विविध सोशल मीडिया प्लॅटफॉर्मवर काही दिवसांपासून या पोस्ट सातत्याने शेअर होत असल्याचे दिसून येत आहे. या पोस्टमध्ये खेडेकर यांना आगामी लोकसभा निवडणुकीत ‘भावी खासदार’ म्हणून प्रोजेक्ट करण्याचा प्रयत्न होत असल्याची चर्चा आहे. त्यामुळे राजकीय वर्तुळात अनेकांच्या भुवया उंचावल्या असून ही मोहीम नेमकी समर्थकांकडून राबवली जात आहे की कोणाच्या खोडसाळपणातून सुरू झाली आहे, याबाबत तर्कवितर्क लावले जात आहेत.
Eknath Khadse, Girish Mahajan : बुलढाण्याच्या सिंचनाचा मुद्दा; खडसेंचा सवाल, महाजनांचे उत्तर!
दरम्यान, सध्या या मतदारसंघाचे प्रतिनिधित्व करणारे खासदार प्रतापराव जाधव हे केंद्रातील राजकारणात प्रभावी मानले जातात. त्यांच्या उपस्थितीत ‘भावी खासदार’ अशा पोस्टचा प्रचार सुरू होणे ही बाब अनेकांच्या चर्चेचा विषय ठरली आहे. त्यामुळे या सोशल मीडिया मोहिमेमागे काही राजकीय रणनीती आहे का, असा प्रश्नही उपस्थित केला जात आहे.
राजकीय विश्लेषकांच्या मते, आगामी निवडणुकांच्या पार्श्वभूमीवर सोशल मीडियाचा वापर करून जनमताची चाचपणी करण्याची ही एक प्रकारची रणनीती असू शकते. काही जणांच्या मते, समर्थकांकडून खेडेकर यांच्या नेतृत्वाला पुढे आणण्याचा प्रयत्न सुरू झाला असावा, तर काहींच्या मते विरोधकांकडून वातावरण ढवळून काढण्याचाही हा भाग असू शकतो.
Siddharth Kharat : ठाकरेंचे आमदार म्हणतात, ‘अर्थसंकल्पाची आकडेवारी आकर्षक’
एकंदरीत, जिल्ह्यातील राजकीय हालचालींना आधीच वेग आला असताना या ‘भावी खासदार’ पोस्टमुळे राजकीय चर्चांना नवे पंख मिळाले आहेत. त्यामुळे या मोहिमेमागील खरा सूत्रधार कोण आणि पुढील काळात या चर्चेला नेमके कोणते राजकीय वळण मिळते, याकडे आता संपूर्ण जिल्ह्याचे लक्ष लागले आहे.
