gdp-growth-congress-bjp-beer-mug-kiren-rijiju : ‘बिअर मग’च्या टीकेला किरेन रिजिजूंचा पलटवार
New Delhi : भारताच्या सकल देशांतर्गत उत्पादनाच्या (जीडीपी) वाढीच्या आकडेवारीवरून काँग्रेस आणि भाजपमध्ये जोरदार राजकीय संघर्ष सुरू झाला आहे. एप्रिल ते जून या तिमाहीत भारताचा विकासदर ७.८ टक्के नोंदवला गेल्यानंतर केंद्र सरकारकडून अर्थव्यवस्थेच्या मजबूत वाटचालीचा दावा करण्यात आला. मात्र, काँग्रेसने या आकडेवारीवरच प्रश्नचिन्ह उपस्थित करत महागाई आणि सर्वसामान्यांच्या आर्थिक अडचणींचा मुद्दा पुढे केला आहे.
पंतप्रधान नरेंद्र मोदी यांनी जागतिक पातळीवर युद्धाचे वातावरण, इंधनाच्या पुरवठा साखळीवरील दबाव आणि विविध आर्थिक आव्हाने असतानाही भारतीय अर्थव्यवस्थेने दमदार कामगिरी केल्याचे म्हटले आहे. सरकारच्या मते, जीडीपीतील वाढ ही देशाच्या आर्थिक क्षमतेचे आणि विकासाच्या गतीचे महत्त्वाचे संकेतक आहे.
मात्र, केरळ काँग्रेसने समाजमाध्यमावरील पोस्टमधून या विकासदरावर उपरोधिक टीका केली. या पोस्टमध्ये बिअरच्या मगाचे छायाचित्र वापरत जीडीपीच्या आकडेवारीची तुलना बिअरच्या फेसाशी करण्यात आली. सरकारकडून विकासाचे चित्र फुगवून दाखवले जात असल्याचा आरोपही काँग्रेसकडून करण्यात आला. महागाईचा सामना करणाऱ्या सामान्य नागरिकांना जीडीपीच्या आकडेवारीपेक्षा रोजच्या जीवनातील वाढते खर्च अधिक महत्त्वाचे असल्याचे काँग्रेसने म्हटले.
काँग्रेसच्या या भूमिकेवर केंद्रीय मंत्री किरेन रिजिजू यांनी तीव्र प्रतिक्रिया दिली. भारताच्या आर्थिक प्रगतीचे कौतुक करण्याऐवजी विरोधकांकडून त्यावर संशय व्यक्त केला जात असल्याचा आरोप त्यांनी केला. काँग्रेसच्या बिअर मगच्या पोस्टचा संदर्भ देत रिजिजू यांनी काँग्रेसच नशेच्या गर्तेत असल्याची उपरोधिक टिप्पणी केली. भारताच्या प्रगतीबद्दल काँग्रेसला एवढा तिटकारा का आहे, असा सवालही त्यांनी उपस्थित केला.
Maratha Reservation : जरांगे पाटलांच्या उपोषणाचा पाचवा दिवस; सरकारचा दावा
दरम्यान, काँग्रेसने सरकारवर जनतेची दिशाभूल केल्याचा आरोप कायम ठेवला आहे. पेट्रोल, डिझेल, पीएनजी, सीएनजी तसेच विविध जीवनावश्यक वस्तूंच्या किमतींचा संदर्भ देत केवळ जीडीपी वाढीचे आकडे सांगून अर्थव्यवस्थेचे वास्तव स्पष्ट होत नसल्याचे पक्षाचे म्हणणे आहे. त्यामुळे ७.८ टक्के विकासदराच्या आकडेवारीभोवती आता आर्थिक चर्चेपेक्षा राजकीय आरोप-प्रत्यारोप अधिक तीव्र झाले असून, सरकारच्या विकासाच्या दाव्याला विरोधकांकडून महागाईच्या मुद्द्याने प्रत्युत्तर दिले जात आहे.
