abhijeet-dipke-reacts-on-ruchika-singh-case-and-questions-fir-over-abusive-remarks-against-pm-modi : “शिवी देणे गुन्हा नाही” म्हणत एफआयआरवर उपस्थित केले प्रश्न
New Delhi : पंतप्रधान नरेंद्र मोदी यांच्याविरोधात जंतर-मंतरवरील आंदोलनादरम्यान आक्षेपार्ह वक्तव्य करणाऱ्या रुचिका सिंग हिने सार्वजनिकरित्या माफी मागितल्यानंतर या प्रकरणाला नवे राजकीय वळण मिळाले आहे. ‘कॉकरोच जनता पार्टी’चे संस्थापक अभिजीत दिपके यांनी या संपूर्ण प्रकरणावर प्रतिक्रिया देत भाजप आणि त्यांच्या आयटी सेलवर जोरदार टीका केली आहे. “शिवी देणे ही वाईट गोष्ट असू शकते, मात्र तो थेट गुन्हा ठरत नाही,” असे म्हणत त्यांनी रुचिका सिंगविरोधात दाखल करण्यात आलेल्या गुन्ह्यावर प्रश्नचिन्ह उपस्थित केले आहे.
जंतर-मंतर येथे झालेल्या आंदोलनादरम्यान काही तरुणांनी पंतप्रधान नरेंद्र मोदी आणि त्यांच्या दिवंगत आईविषयी आक्षेपार्ह शब्दांचा वापर केल्याचा व्हिडिओ सोशल मीडियावर व्हायरल झाला होता. या घटनेनंतर देशभरातून संताप व्यक्त करण्यात आला. त्यानंतर नोएडामधील एका महिला वकिलाने रुचिका सिंगविरोधात तक्रार दाखल केली. पोलिसांनी भारतीय न्याय संहितेतील विविध कलमांअंतर्गत गुन्हा नोंदवून तपास सुरू केला आहे.
District bank election : विचारधारा लॉकरमध्ये; जिल्हा बँकेच्या राजकारणात नव्या समीकरणांची चाहूल
दरम्यान, अभिजीत दिपके यांनी एक्सवरील पोस्टमध्ये भाजपच्या आयटी सेलवर गंभीर आरोप केले. “जर शिवीगाळ केल्यामुळे गुन्हे दाखल होत असतील, तर अनेक वर्षांपासून महिलांविरोधात अश्लील आणि अपमानास्पद भाषा वापरणाऱ्या लोकांवर कारवाई का होत नाही?” असा सवाल त्यांनी उपस्थित केला. तसेच, काही राजकीय नेते आणि लोकप्रतिनिधींनीही सार्वजनिक मंचांवर वादग्रस्त भाषा वापरल्याचा उल्लेख करत, कायद्याचा वापर सर्वांसाठी समान पद्धतीने व्हायला हवा, असे मत त्यांनी व्यक्त केले.
दिपके यांनी भाजपच्या काही नेत्यांची उदाहरणे देत, “या देशात सर्वांसाठी एकच कायदा आहे की वेगवेगळ्या लोकांसाठी वेगवेगळे नियम आहेत?” असा प्रश्न उपस्थित केला. त्यांनी स्पष्ट केले की, एखाद्याने चुकीची भाषा वापरल्यास त्याला समज दिली जाऊ शकते; मात्र प्रत्येक प्रकरणात थेट गुन्हा दाखल करणे योग्य आहे का, यावर समाजात चर्चा होणे आवश्यक आहे.
दुसरीकडे, रुचिका सिंग हिने सोशल मीडियावर व्हिडिओ प्रसिद्ध करून आपल्या वक्तव्याबद्दल खेद व्यक्त केला आहे. “मी काही लोकांच्या चिथावणीला बळी पडले आणि पंतप्रधानांविषयी अपशब्द वापरले. माझ्याकडून झालेली चूक अक्षम्य आहे. मला माझ्या कृतीची लाज वाटत असून मी देशवासीयांची माफी मागते,” असे तिने म्हटले आहे.
या संपूर्ण वादावर पंतप्रधान नरेंद्र मोदी यांनीही भूमिका स्पष्ट केली आहे. त्यांनी प्रसिद्ध केलेल्या व्हिडिओमध्ये, “चुका लहानपणी होतात आणि त्या सुधारण्याची संधीही मिळायला हवी. या तरुणांना शिक्षा करण्याऐवजी योग्य दिशा दाखवण्याची गरज आहे,” असे मत व्यक्त केले. तसेच, संबंधित विद्यार्थ्यांना न्यायालयीन प्रक्रियेत अडकवण्याऐवजी त्यांना समजून घेण्याचे आवाहन त्यांनी समाजाला केले.
Rain red alert : राज्यात पावसाचा कहर; अनेक जिल्ह्यांना रेड अलर्ट
दरम्यान, अभिजीत दिपके यांच्या वक्तव्यानंतर सोशल मीडियावर नव्या चर्चेला सुरुवात झाली असून, अभिव्यक्ती स्वातंत्र्य, सार्वजनिक शिष्टाचार आणि कायद्याची अंमलबजावणी यावर पुन्हा एकदा प्रश्न उपस्थित होत आहेत. या प्रकरणामुळे राजकीय वातावरण तापले असून, आगामी काळात या वादावर विविध पक्षांच्या प्रतिक्रिया समोर येण्याची शक्यता आहे.
