parth-pawar-secret-meeting-with-devendra-fadnavis-chandrashekhar-bawankule-reaction : दोन्ही राष्ट्रवादी एकत्र येण्याच्या चर्चांदरम्यान पार्थ पवारांची फडणवीसांशी ‘गुपचूप’ भेट
Nagpur : राज्यातील राजकीय वातावरण पुन्हा तापले असून राष्ट्रवादी काँग्रेसमधील अंतर्गत घडामोडींना वेग आला आहे. दोन्ही राष्ट्रवादी काँग्रेस गट पुन्हा एकत्र येण्याच्या चर्चांनी जोर धरलेला असतानाच खासदार पार्थ पवार यांनी मुख्यमंत्री देवेंद्र फडणवीस यांची घेतलेली कथित गुप्त भेट चर्चेचा विषय ठरली आहे. त्याचवेळी माजी खासदार आनंद परांजपे यांनी राष्ट्रवादीची साथ सोडून शिंदे गटात प्रवेश केल्यामुळे राज्याच्या राजकारणात नव्या समीकरणांची चर्चा रंगू लागली आहे.
राजकीय वर्तुळात सुरू असलेल्या या चर्चांदरम्यान भाजपचे प्रदेशाध्यक्ष चंद्रशेखर बावनकुळे यांनी यावर प्रतिक्रिया देताना सावध भूमिका घेतली. पार्थ पवार आणि मुख्यमंत्री देवेंद्र फडणवीस यांच्या भेटीबाबत विचारले असता, राष्ट्रवादी काँग्रेसमध्ये शरद पवार यांच्या नेतृत्वाखाली कोणतेही मतभेद असल्याचे मला वाटत नाही, असे त्यांनी स्पष्ट केले. तसेच पार्थ पवार यांनी मुख्यमंत्र्यांची नेमकी कोणत्या कारणासाठी भेट घेतली याची माहिती आपल्याकडे नसल्याचेही त्यांनी सांगितले.
Ashok kharat :17 गुन्हे, 105 साक्षीदार, ईडीचा तपास अन् राजकीय कनेक्शनमुळे प्रकरण अधिक गंभीर!
राज्यात मंत्रिमंडळ विस्तार किंवा फेरबदलाच्या चर्चांनाही सध्या वेग आला आहे. यासंदर्भात बोलताना चंद्रशेखर बावनकुळे यांनी हा निर्णय मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि उपमुख्यमंत्री सुनेत्रा पवार यांच्या स्तरावर घेतला जाणारा विषय असल्याचे स्पष्ट केले. या संदर्भात आपल्याकडे कोणतीही अधिकृत माहिती नसल्याचे सांगत त्यांनी अधिक भाष्य टाळले.
दरम्यान, राष्ट्रवादीतील वाढत्या हालचालींमुळे महायुतीच्या राजकारणातही अनेक तर्कवितर्क लावले जात आहेत. पार्थ पवार आणि फडणवीस यांच्यातील भेटीनंतर राष्ट्रवादीतील काही नेते नव्या राजकीय पर्यायांच्या शोधात आहेत का, याबाबत चर्चा सुरू झाली आहे. आनंद परांजपे यांच्या पक्षांतरामुळेही राष्ट्रवादीतील अस्वस्थता अधिक स्पष्ट झाल्याचे बोलले जात आहे.
Epfo pension : ईपीएफओचा मोठा प्लॅन; किमान पेन्शन तिप्पट होण्याची शक्यता
दुसरीकडे, वैद्यकीय प्रवेशासाठी घेण्यात आलेल्या ‘नीट’ परीक्षेतील कथित पेपरफोडी प्रकरणावर बोलताना बावनकुळे यांनी तीव्र नाराजी व्यक्त केली. विद्यार्थ्यांच्या भविष्याशी खेळ करणाऱ्या समाजविघातक प्रवृत्तींना कोणतीही दया दाखवली जाणार नाही, असे त्यांनी ठामपणे सांगितले. केंद्र आणि राज्य सरकारने या प्रकरणात तातडीने कारवाई सुरू केली असून दोषींवर कठोर कारवाई होईल, असा विश्वास त्यांनी व्यक्त केला.
Ncp political crisis : पार्थ पवारांची मुख्यमंत्र्यांशी गुप्त भेट, आनंद परांजपे थेट सिल्व्हर ओकवर
केंद्रीय शिक्षणमंत्री धर्मेंद्र प्रधान यांच्या राजीनाम्याची मागणी करणाऱ्या काँग्रेसवरही बावनकुळे यांनी निशाणा साधला. काँग्रेसच्या सत्ताकाळातही अशा घटना घडल्या होत्या, त्यामुळे या विषयावर राजकारण करण्याची गरज नाही, असे त्यांनी म्हटले. अत्यंत कमी वेळेत हा घोटाळा उघडकीस आणल्याबद्दल त्यांनी केंद्रीय शिक्षणमंत्री धर्मेंद्र प्रधान यांचे कौतुक केले आणि विद्यार्थ्यांचे नुकसान करणाऱ्यांविरोधात सरकार कठोर पावले उचलेल, असे स्पष्ट केले.
राज्यातील वाढत्या राजकीय हालचाली, राष्ट्रवादीतील अंतर्गत चर्चा आणि महायुतीतील संभाव्य बदलांच्या पार्श्वभूमीवर येत्या काही दिवसांत महाराष्ट्राच्या राजकारणात आणखी मोठ्या घडामोडी घडण्याची शक्यता व्यक्त केली जात आहे.
_
