epfo-pension-hike-pf-withdrawal-atm-upi-update-marathi-news : आता एटीएम आणि यूपीआयमधूनही पीएफ काढता येणार?
New Delhi : देशातील कोट्यवधी नोकरदार आणि निवृत्तीवेतनधारकांसाठी कर्मचारी भविष्य निधी संघटना मोठे बदल करण्याच्या तयारीत आहे. ईपीएफओच्या नव्या डिजिटल धोरणामुळे कर्मचारी आणि पेन्शनधारकांना अनेक सुविधा मिळण्याची शक्यता निर्माण झाली आहे. विशेष म्हणजे किमान निवृत्तीवेतन एक हजार रुपयांवरून तीन हजार रुपयांपर्यंत वाढवण्याचा प्रस्ताव चर्चेत असून त्यावर केंद्र सरकार गंभीरपणे विचार करत असल्याची माहिती समोर येत आहे. त्याचबरोबर ईपीएफओ 3.0 अंतर्गत एटीएम आणि यूपीआयच्या माध्यमातून पीएफची रक्कम काढण्याची सुविधा उपलब्ध होण्याची शक्यता वर्तवली जात आहे.
देशातील सात कोटींहून अधिक कर्मचारी ईपीएफओशी जोडलेले आहेत. या सर्व सदस्यांसाठी निधी काढण्याची प्रक्रिया अधिक जलद, पारदर्शक आणि सुलभ करण्यासाठी डिजिटल प्रणाली विकसित करण्यात येत आहे. सध्या पीएफ रक्कम काढण्यासाठी अनेक टप्प्यांतून जावे लागते. मात्र, नव्या प्रणालीमुळे दावा प्रक्रिया वेगवान होईल आणि थेट डिजिटल माध्यमातून पैसे खात्यात जमा होतील, असा दावा केला जात आहे.
Ncp political crisis : पार्थ पवारांची मुख्यमंत्र्यांशी गुप्त भेट, आनंद परांजपे थेट सिल्व्हर ओकवर
ईपीएफओ 3.0 या नव्या प्रणालीअंतर्गत सदस्यांना एटीएम कार्ड देण्याची योजना आखली जात असल्याची चर्चा आहे. या कार्डच्या माध्यमातून पीएफची रक्कम थेट एटीएममधून काढता येईल. तसेच यूपीआय आणि डिजिटल बँकिंगशीही ईपीएफओ प्रणाली जोडली जाणार असल्याची माहिती समोर आली आहे. त्यामुळे भविष्यात मोबाईल अॅप्सच्या माध्यमातूनही पीएफ रक्कम सहज उपलब्ध होऊ शकते. मात्र, गुगल पे किंवा फोनपे वॉलेटमधून थेट पीएफ काढण्याबाबत अद्याप कोणतीही अधिकृत घोषणा करण्यात आलेली नाही.
ईपीएफओकडून सर्व प्रक्रिया डिजिटल करण्यावर भर दिला जात आहे. कागदपत्रांची संख्या कमी करणे, ऑनलाइन दावा प्रक्रिया वेगवान करणे आणि कार्यालयीन विलंब टाळणे हा या नव्या बदलामागील मुख्य उद्देश असल्याचे सांगितले जात आहे. तंत्रज्ञानाच्या वापरामुळे कर्मचारी आणि निवृत्तीवेतनधारकांना वारंवार कार्यालयीन फेऱ्या माराव्या लागणार नाहीत. तसेच कागदी फाइल्सवरील अवलंबित्व कमी होऊन संपूर्ण प्रक्रिया अधिक पारदर्शक होण्याची अपेक्षा व्यक्त केली जात आहे.
Pm Narendra Modi : ऊर्जा संकट आणि जागतिक युद्धांच्या सावटामुळे विकास धोक्यात
दरम्यान, ईपीएस-95 अंतर्गत मिळणाऱ्या किमान पेन्शन वाढीची मागणी अनेक वर्षांपासून सुरू आहे. सध्या अनेक निवृत्तीवेतनधारकांना केवळ एक हजार रुपये मासिक पेन्शन मिळते. त्यामुळे ही रक्कम किमान तीन हजार रुपये किंवा काही मागण्यांनुसार सात हजार पाचशे रुपयांपर्यंत वाढवण्याची मागणी होत आहे. यासंदर्भात सरकारकडून सकारात्मक विचार सुरू असल्याची चर्चा असली तरी अधिकृत निर्णय अद्याप जाहीर झालेला नाही.
ईपीएफओच्या या संभाव्य बदलांमुळे देशातील कोट्यवधी कर्मचारी आणि निवृत्तीवेतनधारकांना मोठा दिलासा मिळण्याची शक्यता आहे. डिजिटल व्यवहार, झटपट निधी उपलब्धता आणि पेन्शन वाढीच्या चर्चेमुळे कर्मचारी वर्गात उत्सुकता निर्माण झाली असून आता सरकारच्या अधिकृत घोषणेकडे सर्वांचे लक्ष लागले आहे.
__
