fda-new-complaint-portal-pune-records-highest-complaints-tukaram-mundhe : तक्रार करण्यात पुणे अव्वल, तुकाराम मुंढेंची माहिती
Pune : महाराष्ट्रातील अन्न सुरक्षा आणि स्वच्छतेबाबत नागरिकांमध्ये जागरूकता वाढत असल्याचे चित्र समोर आले आहे. अन्न आणि औषध प्रशासनाच्या (एफडीए) नव्याने सुरू करण्यात आलेल्या ऑनलाइन तक्रार निवारण पोर्टलवर राज्यातील सर्वाधिक तक्रारी पुणे जिल्ह्यातून प्राप्त झाल्या असून, त्यातील बहुतांश तक्रारी अस्वच्छ अन्न, हॉटेल्समधील स्वच्छतेचा अभाव आणि खाद्यपदार्थांच्या दर्जाबाबत असल्याची माहिती एफडीएचे आयुक्त तुकाराम मुंढे यांनी दिली.
पुण्यात मराठा चेंबर ऑफ कॉमर्स, इंडस्ट्रीज अँड ॲग्रीकल्चर (एमसीसीआयए) आयोजित अन्न सुरक्षा परिषदेत प्रसारमाध्यमांशी संवाद साधताना तुकाराम मुंढे यांनी ही माहिती जाहीर केली. नागरिकांनी मोठ्या प्रमाणावर पोर्टलचा वापर केल्यामुळे अन्न सुरक्षा व्यवस्थेतील त्रुटी समोर येण्यास मदत होत असल्याचे त्यांनी सांगितले.
नागरिकांना अन्नपदार्थांमधील भेसळ, अस्वच्छता किंवा अन्न सुरक्षेशी संबंधित तक्रारी सहज नोंदवता याव्यात, यासाठी एफडीएने अलीकडेच नवीन ऑनलाइन तक्रार पोर्टल सुरू केले आहे. हे पोर्टल सुरू झाल्यानंतर अवघ्या २४ तासांत सुमारे १० लाख नागरिकांनी संकेतस्थळाला भेट दिली. त्याचबरोबर राज्यभरातून मोठ्या प्रमाणात तक्रारी नोंदवण्यात आल्याने या उपक्रमाला उत्स्फूर्त प्रतिसाद मिळाल्याचे स्पष्ट झाले आहे.
Monsoon session : पावसाळी अधिवेशनाच्या पहिल्याच दिवशी गदारोळाची चिन्हे!
नवीन डिजिटल तक्रार व्यवस्थेनुसार, नागरिकांनी तक्रार दाखल केल्यानंतर संबंधित विभागाच्या एफडीए संयुक्त आयुक्तांना २४ तासांच्या आत तिची दखल घेणे बंधनकारक राहणार आहे. त्यानंतर संबंधित अधिकाऱ्याकडे चौकशी आणि कारवाईची जबाबदारी सोपवली जाईल. निर्धारित कालावधीत कारवाई न झाल्यास ती तक्रार आपोआप वरिष्ठ अधिकाऱ्याकडे वर्ग होणार असल्याने संपूर्ण प्रक्रियेत पारदर्शकता आणि उत्तरदायित्व वाढण्यास मदत होईल.
यावेळी तुकाराम मुंढे यांनी भविष्यात आधुनिक तंत्रज्ञानाच्या वापरावरही भर देण्याचे संकेत दिले. ज्या हॉटेल्स, रेस्टॉरंट्स किंवा खाद्य व्यावसायिकांवर यापूर्वी अन्न सुरक्षा नियमांचे उल्लंघन केल्याप्रकरणी कारवाई झाली आहे, त्यांची कायमस्वरूपी आणि छेडछाड न होणारी नोंद ठेवण्यासाठी ‘ब्लॉकचेन’ तंत्रज्ञानाचा वापर करण्याचा विचार सुरू असल्याचे त्यांनी सांगितले. यामुळे नियमभंग करणाऱ्यांना वारंवार पळवाटा शोधणे कठीण होईल, असा विश्वास त्यांनी व्यक्त केला.
अन्न व्यवसायिकांनी अन्न सुरक्षा व्यवस्थापन प्रणालीचे काटेकोर पालन करावे तसेच भारतीय अन्न सुरक्षा आणि मानके प्राधिकरणाने (एफएसएसएआय) निर्धारित केलेल्या सर्व २२ प्रमुख नियमांचे पालन करणे अत्यावश्यक असल्याचे आवाहनही तुकाराम मुंढे यांनी केले. ग्राहकांचा विश्वास टिकवण्यासाठी स्वच्छता, सुरक्षित अन्न आणि नियमांचे पालन हीच सर्वात मोठी जबाबदारी असल्याचे त्यांनी स्पष्ट केले.
Rohit Pawar : मतदारसंघ पुनर्रचना विधेयकावरून राष्ट्रवादीत दोन सूर
एफडीएच्या नव्या पोर्टलला मिळालेला मोठा प्रतिसाद आणि पुण्यातून नोंदवलेल्या सर्वाधिक तक्रारी या अन्न सुरक्षा व्यवस्थेतील सुधारणा आणि नागरिकांच्या वाढत्या सजगतेचे महत्त्वपूर्ण संकेत मानले जात आहेत. आता या तक्रारींवर किती प्रभावी आणि तातडीने कारवाई होते, याकडे नागरिकांसह अन्न व्यवसायिकांचेही लक्ष लागले आहे.
