सरकार पाठीशी म्हणत दिला शब्द, शेतकऱ्यांची दिवाळी काळी होऊ देणार नाही
Yavatmal : राज्यावर दुष्काळाचे सावट असताना राज्य सरकार शेतकऱ्यांच्या पाठीशी खंबीरपणे उभे आहे. शेतकऱ्यांच्या प्रश्नांना प्राधान्य देत त्यांच्या अडचणी दूर करण्यासाठी सरकार कटिबद्ध आहे. सरकारच्या तिजोरीवर पहिला अधिकार बळीराजाचा असून, शेतकऱ्यांची दिवाळी काळी होऊ देणार नाही, असा ठाम विश्वास उपमुख्यमंत्री तथा शिवसेनेचे मुख्य नेते एकनाथ शिंदे यांनी व्यक्त केला. यवतमाळ येथे एका कार्यक्रमानिमित्त ते बोलत होते.
राज्यातील प्रतिकूल परिस्थितीचा संदर्भ देताना शिंदे यांनी शेतकऱ्यांना दिलासा देण्याची सरकारची भूमिका स्पष्ट केली. मुख्यमंत्री, उपमुख्यमंत्री आणि मंत्रिमंडळातील सहकाऱ्यांनी शेतातील पिकांची स्थिती जाणून घेण्यासाठी थेट बांधावर जाऊन पाहणी केली. या माध्यमातून शेतकऱ्यांच्या समस्या समजून घेत त्यांना धीर देण्याचा प्रयत्न करण्यात आला. संकटाच्या काळात शेतकऱ्यांनी चिंता करू नये, सरकार त्यांच्या पाठीशी असल्याची ग्वाहीही त्यांनी दिली.
प्रकल्पांसाठी सरकारकडे वेळ, मग शेतकऱ्यांच्या प्रश्नांकडे दुर्लक्ष का? काँग्रेसचा सवाल
शेतकऱ्यांना मदत करण्याबाबत सरकारची भूमिका स्पष्ट करताना शिंदे म्हणाले की, शेतकरी संकटात असताना त्यांना सर्वतोपरी मदत करणे ही सरकारची जबाबदारी आहे. शेतकऱ्यांच्या हितासाठी आवश्यक निर्णय घेतले जातील. केवळ आश्वासने देण्यापेक्षा ती प्रत्यक्षात पूर्ण करण्याला आपले प्राधान्य असल्याचेही त्यांनी अधोरेखित केले.
अडीच वर्षांपूर्वी मुख्यमंत्री म्हणून काम करताना जनहिताचे अनेक धाडसी निर्णय घेतल्याचा उल्लेख शिंदे यांनी केला. महिलांसाठी सुरू करण्यात आलेल्या ‘मुख्यमंत्री माझी लाडकी बहीण’ योजनेचा निर्णयही याच कार्यकाळात घेण्यात आल्याचे त्यांनी सांगितले. सध्या उपमुख्यमंत्री म्हणून काम करत असतानाही सामान्य माणसाच्या हिताला केंद्रस्थानी ठेवूनच निर्णय घेत असल्याचे त्यांनी स्पष्ट केले.
लाडकी बहीण योजना बंद होणार असल्याच्या विरोधकांच्या दाव्यालाही शिंदे यांनी प्रत्युत्तर दिले. ही योजना बंद होणार नसल्याचे सांगत त्यांनी लाभार्थी महिलांना दिलासा देण्याचा प्रयत्न केला. तसेच शेतकऱ्यांना सण साजरा करता यावा, यासाठी दिवाळीच्या मदतीचाही त्यांनी उल्लेख केला.
यवतमाळ जिल्हा बँकेच्या अध्यक्षपदासाठी चुरस; जाधव, देशमुख की भाकरे?
राजकारणात विश्वासाला महत्त्व असल्याचे सांगत जनतेला दिलेला शब्द पूर्ण करण्यावर आपला भर असल्याचे शिंदे यांनी नमूद केले. शेतकरी, महिला आणि सर्वसामान्य नागरिकांच्या हितासाठी सरकार कार्यरत राहील, असा विश्वासही त्यांनी व्यक्त केला.
