baramati-byelection-2026-result-sunetra-pawar-leads-bichukale-munde-vote-count : सुनेत्रा पवारांची प्रचंड आघाडी, बिचुकले-मुंडे यांची मतांमध्ये नामुष्की”
Baramati : राज्यातील राजकीय दृष्ट्या अत्यंत महत्त्वाच्या ठरलेल्या बारामती विधानसभा पोटनिवडणुकीच्या मतमोजणीत पवार कुटुंबाचा प्रभाव पुन्हा एकदा स्पष्ट दिसून येत आहे. राज्याचे उपमुख्यमंत्री अजित पवार यांच्या अपघाती निधनानंतर रिक्त झालेल्या या मतदारसंघात त्यांच्या पत्नी आणि राज्याच्या उपमुख्यमंत्री सुनेत्रा पवार यांनी निवडणुकीच्या रिंगणात उतरून सुरुवातीपासूनच आघाडी घेतली आहे. मतमोजणीच्या ताज्या घडामोडीनुसार तिसऱ्या फेरीअखेर सुनेत्रा पवार तब्बल 26 हजार 773 मतांनी आघाडीवर असून विजयाच्या दिशेने वेगाने वाटचाल करताना दिसत आहेत.
मतमोजणीच्या पहिल्याच फेरीपासून सुनेत्रा पवार यांनी आघाडी घेत प्रतिस्पर्ध्यांना दूर ठेवले. पहिल्या फेरीअखेर त्यांनी 8 हजार 828 मतं मिळवत सुमारे 6 हजार 500 मतांची आघाडी घेतली होती. त्याच वेळी इतर उमेदवारांना अत्यल्प मतं मिळाल्याने ही निवडणूक एकतर्फी होत असल्याचे चित्र दिसून आले. करुणा मुंडे यांना केवळ 10 मतं मिळाली, तर अभिजित बिचुकले यांना अवघी 7 मतं मिळाल्याने त्यांची निवडणूक कामगिरी अत्यंत निराशाजनक ठरली. नोटाला 28 मतं मिळाल्याची नोंद झाली आहे.
या पोटनिवडणुकीत एकूण 23 उमेदवार रिंगणात होते. काँग्रेसचे उमेदवार आकाश मोरे यांनी माघार घेतल्यानंतर प्रमुख राजकीय पक्षांचा थेट मुकाबला या निवडणुकीत दिसला नाही. नोंदणीकृत राजकीय पक्षांपैकी न्यू राष्ट्रीय समाज पार्टीचे आर. वाय. घुटूके आणि हिंदुस्थान जनता पार्टीचे सतीश कदम हे उमेदवार मैदानात होते, तर उर्वरित 21 उमेदवार अपक्ष होते. त्यामध्ये करुणा मुंडे, अभिजित बिचुकले यांसारख्या चर्चेत असलेल्या व्यक्तींचाही समावेश होता.
Pocso crime rise : महाराष्ट्रात पोक्सोचा स्फोट, “दर ५३ मिनिटांनी चिमुकली असुरक्षित !
मतदारांच्या प्रतिसादाबाबत बोलायचे झाल्यास, यंदाच्या पोटनिवडणुकीत मतदानाची टक्केवारी घटल्याचे दिसून आले. सुमारे 58.27 टक्के मतदारांनी मतदानाचा हक्क बजावला, तर मागील निवडणुकीत ही टक्केवारी 71.86 इतकी होती. बारामती मतदारसंघात एकूण 3 लाख 84 हजार 579 मतदार असून त्यापैकी 2 लाख 24 हजार 87 मतदारांनी मतदान केले.
सध्या सुरू असलेल्या मतमोजणीत सुनेत्रा पवार यांची आघाडी सातत्याने वाढत असल्याने ही निवडणूक जवळपास एकतर्फी ठरत असल्याचे चित्र आहे. पवार कुटुंबाच्या प्रभावाला मतदारांनी पुन्हा एकदा मान्यता दिल्याचे संकेत मिळत असून, विरोधकांच्या अनुपस्थितीत आणि अपक्ष उमेदवारांच्या कमकुवत आव्हानामुळे ही निवडणूक औपचारिकतेपुरती मर्यादित राहिल्याची चर्चा राजकीय वर्तुळात रंगू लागली आहे.
