chhatrapati-sambhajinagar-municipal-corporation-23-corporators-face-disqualification-notices-bjp-mim : छत्रपती संभाजीनगर महापालिकेत राजकीय भूकंपाची चिन्हे!
Chhatrapati Sambhajinagar : छत्रपती संभाजीनगर महापालिकेच्या राजकारणात मोठी उलथापालथ होण्याची शक्यता निर्माण झाली आहे. महापालिकेतील तब्बल २३ नगरसेवकांना अपात्रतेच्या नोटिसा बजावण्यात आल्याने शहराच्या राजकीय वर्तुळात खळबळ उडाली आहे. विशेष म्हणजे, या नगरसेवकांमध्ये सत्ताधारी भारतीय जनता पक्षाचे सात तर विरोधी पक्ष असलेल्या एमआयएमचे सोळा नगरसेवकांचा समावेश असल्याने आगामी काळात महापालिकेतील सत्तासमीकरणांवर त्याचा मोठा परिणाम होण्याची शक्यता व्यक्त केली जात आहे.
महापालिका निवडणुकीत पराभूत झालेल्या काही उमेदवारांनी महाराष्ट्र महापालिका अधिनियमांतर्गत संबंधित नगरसेवकांविरोधात अपात्रतेच्या याचिका दाखल केल्या होत्या. या याचिकांमध्ये बेकायदा बांधकाम, अतिक्रमण आणि दोनपेक्षा अधिक अपत्ये असल्याचे आरोप करण्यात आले आहेत. या गंभीर आरोपांची दखल घेत प्रशासनाने प्राथमिक चौकशी सुरू केली असून, संबंधित विभागांकडून आवश्यक माहितीही मागविण्यात आली आहे.
नगर सचिव विभाग, जन्म-मृत्यू नोंदणी विभाग आणि अतिक्रमण विभागाने या प्रकरणांची प्राथमिक पडताळणी पूर्ण केली आहे. त्यानंतर सर्व २३ नगरसेवकांना नोटिसा बजावून त्यांची बाजू मांडण्याची संधी देण्यात आली आहे. प्रशासनाकडून ऑगस्ट आणि सप्टेंबर महिन्यात या प्रकरणांवर सुनावणी होणार असून, संबंधित नगरसेवकांना आवश्यक कागदपत्रांसह उपस्थित राहण्याचे आदेश देण्यात आले आहेत.
Amit shah visit : अमित शाहांच्या पुणे दौऱ्यापूर्वी पोलिसांची मोठी कारवाई!
प्रशासनाने स्पष्ट केले आहे की, सुनावणीदरम्यान संबंधित नगरसेवकांनी समाधानकारक स्पष्टीकरण दिले नाही किंवा आवश्यक कागदपत्रे सादर केली नाहीत, तर त्यांच्याविरोधात एकतर्फी निर्णय घेतला जाऊ शकतो. त्यामुळे संबंधित नगरसेवकांचे राजकीय भवितव्य आता या सुनावणीवर अवलंबून आहे.
या कारवाईमुळे भारतीय जनता पक्षाची चिंता वाढली आहे. भाजपचे सात नगरसेवक अपात्रतेच्या प्रक्रियेत अडकले असल्याने महापालिकेतील सत्ताधारी पक्षाच्या संख्याबळावर परिणाम होण्याची शक्यता आहे. दुसरीकडे, एमआयएमचे तब्बल सोळा नगरसेवक या प्रकरणात अडकल्याने विरोधी पक्षालाही मोठा धक्का बसू शकतो.
राजकीय जाणकारांच्या मते, जर या प्रकरणात काही नगरसेवक अपात्र ठरले, तर छत्रपती संभाजीनगर महापालिकेतील राजकीय समीकरणे पूर्णपणे बदलू शकतात. नव्या निवडणुकांची शक्यता, पक्षांतर आणि नवीन आघाड्यांच्या चर्चांना वेग येऊ शकतो.
Abhijeet dipke : शिवीगाळ प्रकरणावर अभिजीत दिपकेंचा भाजपवर हल्लाबोल
दरम्यान, ऑगस्ट आणि सप्टेंबर महिन्यात होणाऱ्या सुनावण्यांकडे आता संपूर्ण शहराचे लक्ष लागले आहे. प्रशासनाचा अंतिम निर्णय केवळ २३ नगरसेवकांचे भवितव्य ठरवणार नाही, तर छत्रपती संभाजीनगरच्या राजकारणाला नवे वळण देणारा ठरू शकतो.
