rahul-gandhi-slams-centre-over-152-paper-leaks-in-10-years-students-future : ‘एकालाही शिक्षा नाही’, राहुल गांधींची केंद्रावर सडकून टीका
New Delhi: देशातील परीक्षा व्यवस्थेवर गंभीर प्रश्नचिन्ह उपस्थित करत लोकसभेतील विरोधी पक्षनेते राहुल गांधी यांनी केंद्र सरकारवर जोरदार टीका केली. डेहराडून येथे आयोजित ‘छात्रों की गुंज’ या कार्यक्रमात बोलताना त्यांनी गेल्या दहा वर्षांत देशभरात १५२ पेपरफुटीच्या घटना घडल्याचा दावा केला. या घटनांचा थेट परिणाम साडेसात कोटी विद्यार्थ्यांच्या भवितव्यावर झाला असून, इतक्या मोठ्या गैरप्रकारांनंतरही एकाही दोषीला शिक्षा झालेली नाही, ही देशासाठी अत्यंत लज्जास्पद बाब असल्याचे त्यांनी म्हटले.
राहुल गांधी यांनी पेपरफुटीला “देशाला लागलेला महारोग” असे संबोधत ही समस्या केवळ काही मोजक्या घटनांपुरती मर्यादित नसल्याचे सांगितले. दूरदर्शन आणि वृत्तपत्रांमध्ये प्रसिद्ध होणाऱ्या बातम्या या केवळ हिमनगाचे टोक असून, प्रत्यक्षात पेपरफुटीचे जाळे देशभर खोलवर रुजल्याचा आरोप त्यांनी केला. विविध भरती परीक्षा तसेच नीटसारख्या राष्ट्रीय स्तरावरील परीक्षांचे प्रश्नपत्रिकांचे व्यवहार खुलेआम होत असल्याचेही त्यांनी नमूद केले.
त्यांच्या मते, टेलिग्राम आणि सिग्नलसारख्या डिजिटल माध्यमांचा वापर करून प्रश्नपत्रिका विक्रीचे रॅकेट चालवले जाते. या संपूर्ण व्यवस्थेमध्ये काही कोचिंग क्लासेस, प्रश्नपत्रिका तयार करणारे घटक आणि काही वरिष्ठ अधिकारी सहभागी असल्याचा गंभीर आरोपही त्यांनी केला.
सरकारी नोकरीच्या संधी कमी होत असताना तरुणांसमोर निर्माण झालेल्या अडचणींकडेही राहुल गांधी यांनी लक्ष वेधले. उत्पादन क्षेत्र, माहिती तंत्रज्ञान, उद्योजकता आणि खासगी क्षेत्रातील रोजगाराच्या संधी कमी होत असल्याने सरकारी नोकरी हीच अनेक युवकांची शेवटची आशा बनली आहे. मात्र, या प्रक्रियेलाही पेपरफुटीसारख्या गैरप्रकारांनी गालबोट लागल्याची टीका त्यांनी केली.
एका विद्यार्थ्याच्या सरकारी नोकरीच्या तयारीसाठी कुटुंबाला सरासरी नऊ लाख रुपयांपर्यंत खर्च करावा लागतो, असे सांगत त्यांनी देशात सुमारे नऊ कोटी युवक सरकारी नोकरीच्या प्रतीक्षेत असून उपलब्ध पदांची संख्या अवघी सहा लाख असल्याचा दावा केला. म्हणजेच सुमारे १५० उमेदवारांमागे एका उमेदवारालाच संधी मिळते आणि अशा परिस्थितीत पेपरफुटीमुळे विद्यार्थ्यांची मेहनत वाया जाते, असे त्यांनी म्हटले.
यावेळी त्यांनी रिया कुमारी या २३ वर्षीय विद्यार्थिनीचा उल्लेख केला. नीट परीक्षेतील पेपरफुटीच्या बातम्यांमुळे ती नैराश्यात गेली आणि तिने आत्महत्या केल्याचा दावा करत राहुल गांधी यांनी तिचे वडील रमेश बाल यांना मंचावर आमंत्रित केले. हा केवळ प्रशासनाचा निष्काळजीपणा नसून एका कुटुंबाच्या अनेक वर्षांच्या कष्टांचा अपमान असल्याचे त्यांनी सांगितले.
परीक्षा व्यवस्थेत व्यापक सुधारणा करण्याची मागणी करत राहुल गांधी यांनी विद्यार्थी-केंद्रित प्रणालीची गरज व्यक्त केली. सॅट आणि जीमॅटसारख्या आधुनिक आणि सुरक्षित परीक्षा पद्धतींचा विचार करण्याची वेळ आली असल्याचे ते म्हणाले. नव्या प्रणालीत एकाच वर्गातील विद्यार्थ्यांना वेगवेगळ्या प्रश्नसंचांद्वारे परीक्षा घेता येईल, त्यामुळे पेपरफुटीची शक्यता कमी होईल, असे त्यांनी स्पष्ट केले.
याशिवाय परीक्षा प्रक्रिया खासगी कंपन्यांकडे सोपवून सरकार जबाबदारी झटकू शकत नाही, असे सांगत त्यांनी विद्यापीठांचे कुलगुरू आणि परीक्षा यंत्रणांचे प्रमुख हे राजकीय प्रभावापासून पूर्णपणे मुक्त असावेत, अशीही मागणी केली. परीक्षा व्यवस्थेतील पारदर्शकता, जबाबदारी आणि विद्यार्थ्यांचा विश्वास पुन्हा निर्माण करण्यासाठी केंद्र सरकारने तातडीने ठोस उपाययोजना कराव्यात, असे आवाहन राहुल गांधी यांनी केले.
