Congress leader Nana Patole took notice of BJP leader Parinay Phuke’s allegations : वरच्या सभागृहात विरोधी पक्षाचे नेते त्यांना उत्तर देतील
गडचिरोली जिल्ह्यातील राईस मिलच्या भरडईच्या कामातील कथित गैरव्यवहार विधानसभेत मांडण्यासाठी फिक्सिंग झाले होते, असा आरोप भाजपचे आमदार डॉ. परिणय फुके यांनी विधान परिषदेत करून खळबळ उडवून दिली होती. त्यांचा रोख कुणाकडे आहे, याची चर्चा त्यानंतर सुरू झाली. त्यावर आज (१३ मार्च) नाना पटोले यांना विचारले असता, परिणय फुके आमच्या सभागृहाचे सदस्य नाहीत. असली कामे त्यांच्या सभागृहात होत असतील, असे ते म्हणाले.
काही दिवसांपूर्वी नाना पटोले यांनी या संदर्भात हा प्रश्न विधानसभेत मांडला होता. यानंतर डॉ. फुके यांनी विधान परिषदेत यावर लक्षवेधी सूचना मांडली. यात निवडक सात राईस मिल्सची नावे लक्षवेधीत घेण्यात आली. या आर्थिक व्यवहाराचे फिक्सिंग झाल्याचा आरोप केला आहे. डॉ. फुके यांनी हा आरोप करताना कुणा नेत्याचे नाव घेतले नाही. परंतु हा प्रश्न नाना पटोले यांनी विधानसभेत मांडला होता, याची आठवण त्यानिमित्ताने झाली. त्यामुळे ते आमदार महोदय कोण असावे, यावर तर्कवितर्क लावले जात आहेत.
चिल्लर माणसाबद्दल बोलायचे नाही..
यासंदर्भात नाना पटोले आज पत्रकारांशी बोलताना म्हणाले, परिणय फुके वरच्या सभागृहातील सदस्य आहेत. ते आमच्या सभागृहातील सदस्य नाहीत. वरच्या सभागृहात विरोधी पक्षाकडून त्या विषयावर समाचार घेण्यासाठी आम्ही लावू. आमच्या सभागृहात असं होत नाही. त्या वरच्या सभागृहात असं असेल तर विरोधी पक्षाकडून समाचार घेऊ. मला त्या विषयावर अधिक बोलायचं नाही आणि तो माझा विषय देखील नाही. असल्या चिल्लर माणसावर मला बोलायचं नाही. याविषयीची प्रतिक्रिया वरच्या सभागृहात आमच्या विरोधी पक्षाचे नेते देतील, असेही पटोले यांनी सांगितले.
